TIMOKUCHAZ

ASKARI Polisi wawili ambao picha yao ilisambazwa kwenye mitandao ya kijamii wiki hii katika mkao wa uhusiano wa kimapenzi, wamefukuzwa kazi. Picha hiyo ilionesha askari hao wa Kikosi cha Usalama Barabarani wakiwa kwenye sare za jeshi hilo huku mwanamume akiwa amempakata wa kike wakipigana busu.

Aidha askari mwenzao anayedaiwa kupiga picha hiyo mwaka 2012 na kuisambaza kwenye mtandao wa kijamii, naye amefukuzwa kazi. Polisi mkoani Kagera imesema imewafukuza kazi askari hao watatu kwa kosa la kukosa maadili mema ya jeshi hilo.

Akizungumza na waandishi wa habari jana mjini hapa, Kamanda wa Polisi wa Mkoa wa Kagera, Herny Mwaibambe alitaja askari walio kwenye picha hiyo ni Namba F.7788 PC Mpaji Mwamsumbi na WP 8898 PC Veronica Mdeme, wote wa Wilaya ya Missenyi.

Aliyewapiga picha ni askari mwenye namba G.2122 PC Fadhili Linga. Kwa mujibu wa Kamanda, walipiga picha mwaka 2012 wakiwa kazini kabla ya kusambazwa kwenye mitandao mbalimbali hivi karibuni ikionesha Veronica akiwa amemkalia Mpaji mapajani. Kamanda alisema picha hiyo inakwenda kinyume na maadili mema ya jeshi hilo.

Aidha alisema walipiga picha hiyo wakiwa kazini na wamevaa sare za kazi. Kwa upande wa Fadhili, Kamanda alisema anakabiliwa na kosa la kuwapiga picha wenzake hao kwa kutumia simu yake ya kiganjani na kutuma kwenye mitandao mbalimbali wakati akijua ni kinyume cha maadili ya Jeshi la Polisi.

Kosa lingine ni kutuma picha hiyo kwenye mtandao. Alisema picha hiyo iliyoonekana kwenye mtandao ni picha halisi ambayo haijachakachuliwa.

Alisisitiza kwamba maadili ya kijeshi yapo kisheria na askari wao wanatambua. Alisema wanapokwenda vyuoni wanafundishwa namna ya kuishi katika maisha ya utumishi wa Jeshi la Polisi